Goizean aurkeztu ditu Arabako Haur Minbizidunen Gurasoen Elkarteak Minbizia duten Haurren Nazioarteko Egunaren harira izango diren ekintzak. Igandera bitartean, hainbat ekintza antolatu dituzte. Hala, Gasteizko ikastetxeetako ikasle eta gurasoek urre-koloreko begiztak eramango dituzte soinean; San Ignacio Ikastetxeko haurrek, esaterako, giza-begizta bat osatuko dute patioan, minbizia duten umeei babesa helarazteko.
Bestetik, larunbatean, ongintzazko 13. bazkaria egingo dute Olarizu jatetxean, eta Julian Iantzi izango da bertan. Eta igandean, gospel musikako ongintzazko kontzertu bat antolatu dute Salburuko gizarte etxean, 12:30ean.
Bataila bat
Ekitaldien berri ematearekin batera, Haur Minbizidunen Gurasoen Elkarteko kide Ernesto Marinek minbizia izan duen haur baten hitzak irakurri ditu: "Gainditzen dugun oro gara. Eta haur minbizia gainditu nuelako naiz bizirik atera den haietako bat. Ez naiz berriz jaio, baina hemen egoteko daukadan grinaren jabe naiz. Orduko hura bidean aurkituko ditudan bataila guztietako bat izan zela ulertuz".