LAB sindikatuak Arabako hiru enpresatan jazotako "indarkeria matxistarekin" eta "emakumeenganako diskriminazioarekin" lotutako hiru egoera salatu berri ditu.
Batetik, Gasteizko Palacio de Elorriaga hotelean, iazko irailean, "haurdun egoteagaitik langile bat kaleratu" zutela salatu du LABek. "Zazpi urteko lan-harremana eta gero", emakumeak bere haurdunaldia enpresari jakinarazi eta bi asteren buruan jaso zuen kaleratze agiria. Langileak kaleratzea salatu zuen, eta urtarrilaren 22an epaiketa egin ondoren, epaiaren zain daude.
Bestalde, joan den urteko azaroan, Arabako Aldundiaj azpikontratatuko enpresa batean, gizon batek emakume bati sexu erasoa egin ziola salatu dute sindikatuko ordezkariek: "Emakumeak salaketa jarri zuen, eta erasotzailea bortxaketa delitu arin bategatik zigortu dute, urruntze agindu bat ezartzeaz gain. Hala ere, enpresak ez du inolako neurririk jarri halako egoera bat berriro gerta ez dadin".
Halaber, Transportes Barreira garraio enpresan hainbat hilabetez emakume langile baten aurka gertatu den sexu jazarpen kasu baten berri eman du LABek: "Enpresako zuzendaritza konplize bilakatu da egoera honetan, ez baitu ezer egin langilea babesteko, erantzukizunak egokitzeko eta halako zerbait berriro gerta ez dadin".
LABek emakume guztiei dei egin die lan munduan gertatzen diren erasoak salatzeko, eta enpresei, berriz, "sexu jazarpena zein diskriminazioa ekiditeko protokoloak martxan jar ditzatela" eskatu diete.