2.404 milioi euro bildu ditu Arabako Ogasunak, 2017an baino %4,4 gehiago

Arabako Aldundiaren Ogasunaren eraikina. QUINTAS

Zuzeneko zergak %12,6 igo dira, batik bat errentaren gaineko zergari esker.

Arabako Foru Ogasunak 2.404 milioi euro bildu ditu 2018an, aurreko urtean baino %4,4 (101 milioi) gehiago. Aurreikusitako diru-bilketa ere gainditu dute iazko zenbakiek.

Nabarmentzekoa da zuzeneko zergek izan duten %12,6ko igoera. Zehazki, zuzeneko zergen bidez 1.158 milioi euro bildu dira, 2017an baino 130 milioi gehiago. Zenbateko horretatik 74 milioi PFEZ bidezko diru-bilketaren igoerari dagozkie, eta 44 milioi sozietateen gaineko zergaren bidez bildu dira. Izan ere, jarduera ekonomikoak eta enpleguak hobera egin izanaren ondorioz, %5,5 igo da konturako atxikipenen bidezko diru-bilketa, eta %6,3 autonomoek egindako ordainketak.

Zeharkako zergetan, orotara %6,3ko hazkundea izan da; alegia, 2017an baino 59 milioi gehiago bildu dira, aurreikusi baino %0,8 gehiago. 

Estatuarekiko doikuntzei dagokienez, 89 milioi euro gutxiago bildu dira, 2017an kupoa erregularizatu zelako, eta horrek 99 milioi euroko finantziazio gehigarria ekarri zuen Ogasunera.

ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide