Asteazkenean irekiko den FITUR Turismoko Nazioarteko Azokari begira, Araba motoz bisitatzeko liburuxka eta bideoa aurkeztu ditu Arabako Foru Aldundiak.
Gidaliburuak lau ibilbide bildu ditu, 54 orritan. Bereziki bigarren mailako errepideei begira diseinatu dituzte ibilbideak, errepide horiek turismo mota hori bideratzeko dituzten abantailei helduta: trafiko gutxi, zoru ona eta "ikuspegi paregabeak".
Orain arte familia turismoa, autokarabana bidezkoa, edota ardoari eta elikagaiei loturiko arloak jorratu dituztenez, oraingoan "bi gurpileko turismoaren txanda" iritsi dela uste du Cristina Gonzalez Turismo diputatuak, "motorrez gozatzeko eta, aldi berean, Arabako turismo erakargarri nagusiak ikusteko pentsaturiko lau ibilbide" proposatuta. Hegoalderantz presarik gabe, Iparralderantz presarik gabe, Haranak, Lautada eta Mendialdea eta Gazteluak eta ardoa dira ibilbide horien izenak. Orotara, 698 kilometroko ibilbidea osatzen dute lau proposamenek.
Turismo bulegoetan ez ezik, Espainiako eta Europako moto klubetan banatuko dute liburuxka, eta ingelesera, frantsesera eta alemanera itzuliko dute. Gidaliburuaz gain, gaian sakondu nahi dutela diote, eta, horretarako, "kuadrillekin koordinatuko" direla aurreratu du Turismo diputatuak