Wirtanen kometa behatzeko prestaketak hasi dituzte Izkin

Wirtanen kometa behatzeko prestaketak hasi dituzte Izkin
46P/Wirtanen kometaren jarraipena egin dute Izkiko behatokitik. / MIKEL MARTINEZ

Datorren igandean ikusiko da hoberen fenomenoa, begi hutsez, baina ondo ikusteko gomendagarria da prismatikoak erabiltzea.

46P/Wirtanen kometa ikusteko prestaketak hasi dituzte Arabako astronomiazaleek: asteburuan lehen hurbilpena egin dute La Otra Mitad elkarteko kideek, Izkiko behatokian. Begi hutsez ikusteko aukera badago ere, oso tamaina txikia du zeruan, eta, horregatik, oso gomendagarria da teleskopioa edo prismatikoak erabiltzea kometa horretaz gozatu ahal izateko.

Behatokian 8 eta 10 hazbeteko teleskopioak baliatu dituzte hasierako behaketa hauek egiteko. Timelapse txikia egin dute ere, ordubetean kometak zeruan marraztutako mugimendua modu errazagoan ikustarazteko. Datorren igandea, hilaren 16a, izango da Wirtanen Lurrera gehien hurbilduko den eguna, orduan 0,0777 unitate astronomikora igaroko baita. Eguraldia lagun, hori izango da objektua ikusteko egunik aproposena. Taurus konstelazioan topatu ahal izango da kometa.

ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide