Argi eta garbi dago oso zaila izaten dela Liga honetan partidarik irabaztea. Horrek erakusten du zer-nolako balentria egiten ari den Alaves taldea. Aukera paregabea zeukan lidergoa eskuratzeko. Baina, aurkaria oso egoera larrian zegoen eta puntuen beharra zeukan. Horren ondorioz, oso partida trabatua izan da, aukera gutxikoa eta hor Leganesek izan duen gol aukera bakarrari hiru puntuko etekina atera dio. Atsedenaldira joateko lau minutu falta zirela En-Nesyri aurrelariak bakar-bakarrik erdi hutsean errematatu du eta gola egin du.
Alavesek lehen zatiari hasiera ona eman dio. Lehendabiziko minutuak jokoaren ekimena eraman du eta zenbait gol aukera sortu ditu. Minutuak joan ahala Leganesek hartu du partidaren gidaritza eta gehiago hurbildu da talde arabarraren areara. Halere, ez dute gol aukerarik sortu. Joan-etorri horretan ailegatu da Leganesen gola.
Bigarren zatia hasi bezain pronto Alavesek berdinketaren bila atera dela erakutsi du. Ondo aritu da zenbait unetan baloia alderik alde mugituz, baina Leganesek aurre egin dio defentsa bikaina eginez. Batez ere, atzealdeko jokalariek ondo urrundu dituzte egindako erdiraketa guztiak.
Abelardok aldaketak egin ditu aurrealdean, taldeari bizitasuna emateko. Baina ez Burguik ezta Borja Bastonek ere ez dute inongo aukerarik izan gola egiteko. Partida azken txanpan sartu denean Guidetti ere zelairatu du, Martinen ordez, baina lehengo lepotik burua. Gauzak ez dira aldatu. Ibaik egindako bi jaurtiketak izan dira Alavesek erasoan egin dituen gauzarik aipagarrienak. Beraz, minutuak joan dira eta ezin punturik bildu.
Pena izan da, zaleek lidergoa nahi zuten, baina... Hurrengo neurketa Sevillaren aurka. Ez da talde makala, goialdean dagoen taldea baita. Beraz, zaleak eta taldea bat eginik hiru puntuak eskuratzera.
Leganes: Lunin, Nyom, Tarin, Omeruo, Siovas, Silva, Recio (38’ Mikel Vesga), R. Perez, Oscar Rodriguez (84’ Eraso), En-Nesyri (86’ Sabin Merino), Carrillo.
Txartel horiak: 14’ Oscar Rodriguez, 61’ Nyom
Alaves: Pacheco; Martin (80’ Guidetti), Laguardia, Ximo Navarrao, Duarte; Ibai, Brasanac, Manu Garcia, Jony (62’ Burgui); Sobrino (62’ Borja Baston) eta Calleri.
Txartel horiak: 48.’ Duarte, 52’. Brasanac, 72’. Laguardia, 73’ Burgui, 75’ Borja Baston
Golak:
1-0: 41'. En-Nesyri
Burtarqueko harmailak:
9.863 ikusle bildu dira Burtarqueko harmailetan. Hotzari aurre eginez Alaveseko zale batzuk bertan izan dira, beti bezala, taldeari animoak emanez.