Babestu Gasteiz ekimenak Arana klinika zaharraren etorkizunaren inguruan deitutako herri-galdeketa ospatu baino egun batzuk lehenago etorri da albistea: Espainiako Gizarte Segurantzak salgai jarri du eraikina 7,6 milioi eurotan.
16.500 metro koadroko orubea okupatzen du Arana klinika zaharrak. 50. hamarkadan zabaldu zuten eta bertan jaio ziren milaka arabar. 1977. urtean, berriz, klinika itxi zuten, eta bertan kokatu zuen Arabako Diputazioak geriatrikoa, baina 2013. urtean itxi zuten. Inguruko auzoko bizilagunen elkarteek behin baino gehiagotan eskatu diote Arabako Diputazioari geriatrikoa berriro zabaltzeko, baina Foru Aldundiak eraikinaren "egiturazko arazoak" aipatu ditu proposamenari uko egiteko, eta eraikinak gutxieneko baldintzak betetzen ez dituela argudiatu du.
Babestu Gasteiz ekimenean bildutako auzo elkarteek, aldiz, geriatrikoa berriro zabaltzeko beharra dagoela nabarmendu dute: "Gasteizen 65 urtetik gora dituzten 41.194 lagun daude, eta horietatik %20 menpekotasunak dituzte (9.838 lagun); sare publikoaren eta pribatuaren artean soilik 5.207 artatzen dituzte; zeinek zainduko ditu menpekotasunak dituzten gainerako 4.623 lagun?". Araba geriatrikoa berriz irekitzeko proposamena babesteko, hurrengo azaroaren 17an, larunbatean, herri-galdeketa deitu dute elkarteek, honako galdera honi erantzuteko: "Aranako geriatriko zaharra berriz irekitzearen alde zaude?".