Ordu erdi eskas besterik ez da behar izan Baskoniaren bazkideentzat lehentasunezkoak ziren 500 sarrerak agortzeko. Salmentan jarri diren lehen sarrera horiek 185 eta 535 euro bitarteko prezioan saldu dira, eta horrelakoetan ohikoa izaten den bezala, merkeenak izan dira agortzen lehenak, salmenta hasi eta hamar minutuko tartean.
Salmentarako egokitutako webguneak, bisita kopurua altuaren eraginez, arazo ugari izan ditu eta zaletu askoren haserrea nabaria izan da sare sozialetan.
Gaurko eguna zuten Baskoniako zaletuek lehentasunez sarrerak eskuratu ahal izateko. Bihartik aurrera, beste egun bateko epea izango dute gainontzeko taldeetako bazkideek ere. Epe hori agortutakoan, ohiko salmenta burutuko da.