Rober Gutierrezek, Bai Euskarari Elkarteko zuzendariak, azaldu du zer den Enpresarean: "Proiektu esperimentala da, euskaraz lan egiten duten edo-eta produktuak zein zerbitzuak euskaraz eskaintzen dituzten enpresak eta profesionalen sarea ehuntzeko, ikustarazteko eta hauen arteko lankidetza sustatzeko helburuekin sortua". Era berean, euskaraz normaltasunez jarduteko baliabide bat ere badela dio: "Enpresarean alor sozioekonomikoan euskaraz aritzeko baliabide bat da, enpresei eta profesionalei proiektuak ezagutzera emateko bidea eskaintzen diena, solasaldirako, eztabaidatzeko eta elkarlana sustatzeko espazio bat partekatzeko aukera errazten diena, enpresen eta profesionalen interesekoak diren gaiak jorratu nahi dituena eta tresna eta bitarteko berriak lantzen eta sortzen lagundu nahi duena. Euskarak balioa ematen dio lurralde honetako alor sozioekonomikoari, eta horregatik, euskaraz eta euskaratik ekarpena egin nahi dugu".
Laugarren edizioa
Enpresarean Azokaren laugarren edizio honetan, hainbat solasaldi, erakustaldi eta mahai-inguru antolatu dituzte, enpresa eta profesionalen arteko elkarlana sustatu eta esperientziak trukatzeko. "Industria 4.0, industria iraultza berria, digitalizazioa, transformazio digitala eta lanaren automatizazioa dira, besteak beste, zuzenean edo zeharka eragiten diguten hito esanguratsu batzuk. Etorkizunerako joera globalak ere aurreikusten ari dira: errobotizazioa, hilezkortasuna, bloke-kateak, gauzen eta pertsonen Internet, bizitza osorako lanposturik eza...", dio Gutierrezek.
Aurtengo Enpresarean Azoka dator enpresa, ekonomia eta lanaren etorkizunaren gaineko aukerei eta mehatxuei, iritziei eta proposamenei erantzuteko asmoarekin Gutierrezek dioenez: "Transformazioa errealitate bat da, onartuta dago, baina erronkari aurre egiteko ikuspegien arteko talka dago. Nolakoa izango da etorkizuneko gizartea? Lehiakortasunak gizartearen ongizatean eragingo al du? Zer gertatuko da sistema sozioekonomikoarekin eta horren bitartekariekin? Nolakoa izango da komunitatea eta administrazio publikoaren arteko harremana? Botere harremanak aldatuko dira? Eragina izango du errobotizazio-prozesuak lanpostuetan? Zeintzuk dira automatizazioaren eragina gehien jasango duten profil profesionalak? Zein lan aukera ekarriko ditu eraldaketa teknologikoak? Nolako lanpostuak izango ditugu? Askatasuna eta segurtasuna uztartzeko gai izango gara?..."
Galdera horien guztien gainean eta pertsonez, digitalizazioaz eta transformazioaren etorkizuneko erronkaz arituko dira urriaren 25ean, Hernaniko Orona-Ideon. Argibide gehiago nahi izanez gero hemen: informazioa, egitaraua, parte-hartzaile guztiak eta izena emateko formularioa.