alea.eus

Armentia ikastolak antolatuko du 2019ko Araba Euskaraz

Erredakzioa 2018-10-10 14:24   Gizartea  Araba

Kultur egitasmoa urte osora zabaltzeko apustua egiten ari direla iragarri dute; ekainaren 16an ospatuko da ikastolen aldeko jai nagusia.

Armentia ikastolak antolatuko du 2019ko Araba Euskaraz
Araba Euskaraz 2019 aurkezteko agerraldia, Europa jauregian. / A. Euskaraz | Ikusi handiago | Argazki originala

Martxan da Araba Euskaraz 2019. Armentia ikastolak antolatuko du aurten eta Liher Larreak, ikastolako Lehendakariak azaldu bezala helburua “gertu egotea" izango da. "Gasteizko, eragileengandik gertu, hiria euskalduntzeko gertu, Arabako herrietatik gertu, euskalgintzatik gertu, berdintasunerako gertu, emateko gertu eta finean… zoriontsu izateko gertu". Hori izango da Armentia ikastolaren helburua etorkizunera begira, eta hori adierazi dute logoarekin.

1981 urtean ospatu zen, lehendabiziko aldiz, Araba Euskaraz, eta ordutik urtero ospatu den jaialdi honek milaka eta milaka arabar batu ditu, euskaraz, herrialde osoan zehar. Armentia ikastolak 25 urte bete ditu, eta dagoeneko 1.200 ikasle baino gehiago ditu. "Jaialdiarekin proiektua sendotzera goaz", azaldu dute. Euskararentzako Araban urte biziki garrantzitsua dela nabarmendu dute "Euskaraldia, Korrikaren bukaera eta Araba Euskarazekin".

Armentiak Arabako ikastolen jaialdia 2006 urtean antolatu zuen azkenekoz, eta ordutik 13 urte igaro direlako Araba Euskaraz antolatzeko "gogotsu" daudela azaldu dute Naroa Velasco eta Iratxe Valle ikasleek. Hori dela eta, kultur egitaraua urte osora zabaltzeko apustua egin dute. "Jaialdia ekainaren 16an izango bada ere, azarotik ekainera antolatu nahi ditugu kultur ekitaldiak, Gasteizen eta Araba osoan, herrietan ere eraginez".

ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Izan zaitez ALEAkide.



Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa