Artziniegan estreinatu da Korterraza jaialdiaren laugarren edizioa, eta irailera bitartean Arabako 28 herritan izango dira film laburren proiekzioak. Gainera, aurten, komediari zuzendutako atal bat estreinatuko du jaialdiak, eta umorezko hamahiru film proiektatuko dira horren barruan. "Urtero komedia asko eta oso onak iristen zaizkigu" esan dute Kultura Kalean! elkarteko antolatzaileek.
Atal berriarekin batera ohikoak diren Super Hautaketa, Korterraza Txiki, eta Mix Hautaketa atalak eskainiko ditu jaialdiak. Korterraza lehiaketara aurkeztutako 771 filmetatik hamaika onenak biltzen ditu Super Hautaketa atalak. Korterraza Txikik, bere aldetik, beste hamaika film labur biltzen ditu: Pixarren Lou, eta Catch it, esate baterako, eta Mix hautapenak aurreko ataletako 23 film labur eta euskarazko lanak txandakatuko ditu.