Saltokietako errotulazioa aldatu, izenak euskaratu eta merkataritza eremuan euskararen erabilera bultzatzeko laguntzak eskainiko ditu Gasteizko Udalak.
Diru-laguntzen eskaera egiteko epea ekainaren 16an hasi eta irailaren 17an amaituko da. Interesatuek herritarrei laguntzeko bulegora jo dezakete informazio gehiago eskuratzeko edo erregistro elektronikotik bideratu dezakete prozesua.
Merkatariek aurkezturiko proiektuaren kostuaren % 50a arte kubritu ahal izango dute eta Bai Euskarari Ziurtagiria eskuratzeko diru-laguntza jasoko dute.
Honakoak dira eskaera egiteko betebeharrak:
- 50 langile baino gehiago ez izatea.
- Urteko negozio-bolumenak edo balantze orokorrak 10 milioi euro ez gainditzea.
- Aurreko baldintzetako bat betetzen ez duten enpresek ehuneko 25eko edo hortik gorako partaidetza zuzena nahiz zeharkakoa ez izatea bertan.
- Administrazio publikoen aurreko zerga-betebeharrak egunean edukitzea, baita Gizarte Segurantzarekiko betebeharrak ere. Gasteizko Udalarekiko zerga-betebeharren egoera ofizioz begiratuko da.
- Nolanahi ere, baztertuta geratzen dira sozietate publikoak eta zuzenbide publikoko erakundeak, baita irabazi-asmorik gabeko erakundeak eta elkarte edo lanbide jarduerak burutzen dituztenak ere (elkarteak, lanbide elkargoak etab.).
- Onuraduna ezingo da egon Diru-laguntzei buruzko azaroaren 17ko 38/2003 Lege Orokorraren arabera horrelakorik jasotzea galarazten duen egoeraren batean.
Izan zaitez ALEAkide!
ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu? Aukera ezberdinak dituzu gure proiektuarekin bat egiteko.