Prozesionari izenez ezagutzen den animalia txikitxoa buruhauste handiak sortzen ari da Araban. Izan ere, azken urteetan nabarmen zabaldu da pinu-beldarra herrialde osoan, eta azkenean Aldundiak izurritea deklaratu behar izan du; 7.330 hektareatan hartuko ditu neurriak, batik bat Kantauriko eskualdean, Arabako Haranean eta Lautadan.
Landare-osasunerako tratamenduak airetik zabalduko dira honako udalerrietan: Laudio, Aiara, Dulantzi, Amurrio, Aramaio, Arraia-Maeztu, Artziniega, Asparrena, Barrundia, Berantevilla, Bernedo, Burgu, Gasteiz, Iruña Oka, Iruraiz-Gauna, Kanpezu, Kuartango, Bastida, Lagran, Guardia, Lantaron, Oion, Okondo, Urizaharra, Erriberabeitia, Donemiliaga, Gaubea, Zalduondo eta Zanbrana. Tenperatura epelak eta Arabako hainbat mendietan dagoen pinudi-dentsitate handiak lagundu dute izurritea zabaltzen.
Pinudietako intsektuak pinu-azikulak jan eta defoliazio handiak sortzen ditu zuhaitzetan. Gainera, pertsonei eta, batez ere, txakurrei kalte egiteko aukera dago.