Zadorrako urtegietako hondartzetako udako denboraldia ireki dute eta dagoeneko prest dira sorosleen lau postuak (bi Garaion, bat Landan eta beste bat Uribarri Ganboan), 12:00etatik 20:00etara.
Aurten, Arabako Foru Aldundiak hainbat obra eta esku-hartze egin ditu zerbitzuak eta horien irisgarritasuna hobetzeko. Horrela, Landan pasabide berri bat jarri dute, mugikortasun arazoak dituzten pertsonak uretan sartu ahal izateko. Gainera, komunetako instalazioetan ere obrak egin dira eta buggy bat erosi da, desgaitasunak dituzten pertsonek ingurumen hezkuntzako jardueretan parte har dezaten.
Halaber, Aldundiko Ingurumen Sailak bizikleta berriak prestatu ditu alokairurako. Izan ere, urtero 80.000 txirrindulari inguruk zeharkatzen dute urtegiaren bide berdea. Oinez zein bizikletaz ibiltzeko prestatuta dagoen ibilbide berde horrek ia-ia 45 kilometro ditu, 13 eta 32 kilometroko bi zirkuitutan banatuta, eta Uribarri Ganboako urtegiaren paisaia eta natura aberastasuna ezagutzeko aukera ematen du.