Arabako arlo soziekonomikoko eragile ezberdinek bat egin dute Lanabes egitasmoak antolatutako jardunaldian, proiektuaren ibilbidea partekatzeko eta etorkizunean Arabako lan mundua euskalduntzeko erronkak irudikatzeko.
Lanabes taldearen xede nagusia Arabako alor sozioekonomikoan euskararen presentzia txertatzea, sustatzea, handitzea eta bitartekoak zein ereduak eskaintzea dela azpimarratu dute Foru Aldundiko ordezkariek. Eta horrekin batera, taldearen sorreratik gaur arte Arabako eremu sozioekonomikoan emandako pausoak nabarmenak izan direla adierazi nahi izan dute.
Lanabes martxan jarri zenetik egindako ibilbidearen balorazio positiboa egin ditu antolatzaileek eta etorkizuneko jomugak zehazten laguntzeko, hausnarketa bateratua egin dute bertaratutako eragileetako ordezkariek. Arabako entitate eta enpresetan euskara sustatu ahal izateko, sentsibilizazioan eragin eta behar besteko baliabideak eskuragarri izatea beharrezkotzat jo dute.
