Igandean, ekainaren 10ean, Gasteizko Emakumeen Lasterketa hamaikagarren edizioa egingo dute. Urtero bezala, 6.000 emakume inguruk hartuko dute parte, berdintasuna eskatzeko eta bularreko minbiziaren eta genero-indarkeriaren kontra borrokatzeko.
Prentsaurrekoan aurkeztu dute gaur. Han izan dira Estibaliz Canto Kirol zinegotzia, Joseba Perez de Heredia Kirol foru zuzendaria, Elena Sagaseta Clara Campoamor elkarteko kidea, Marisa Perez Asamma elkarteko ordezkaria, Patxi Ormazabal Arabako AECCko lehendakaria, eta Martin Fiz atleta eta Emakumeen Lasterketako lehendakaria.
Ekainaren 10eko 11:00etan irtengo da lasterketa Mendizorrotzetik, eta bost kilometro egin ondoren leku berean bukatuko da. Ostiralean, bestetik, 11:00etatik aurrera, Emakumearen Feria irekiko dute Iradier Arenan.