MARIJE ETXANIZ
LABORAL Kutxako komunikazio sailaren buruan dago Marije Etxaniz. Xabier Egibar, berriz, Negozio Garapen Sailaren zuzendaria da. Bata komunikazioan eta bestea negozio / finantzetan adituak, Euskal Herriko berrikuntza eredu eraldatzaileetan dituzte jarriak indarrak; erronka horretan, hizkuntza elkarlanerako ezinbesteko baliabidea dute. Azken Enpresarean Azokan, Egibar izan genuen finantzazio aukera berrien inguruan hitz egiten eta gaur, enpresarean.eus webgunea berritu dugula, proiektua haien betaurrekoetatik ezagutu nahi izan dugu.
Enpresen eta profesionalen sarea. Enpresarean. Nola aurkeztuko zenioke proiektua ezagutzen ez duen norbaiti?
Enpresa eta profesionalak euskaraz sarean elkartzeko helburua duen egitasmo bezala aurkeztuko nuke Enpresarean. Euskaraz jarduteko konpromisoa nabarmenduko nuke, bereizgarri nagusi bezala.
Laboral Kutxaren ikuspegitik, zein ekarpen egin dezake Enpresarean bezalako proiektu batek finantza eta negozio sarean?
Lehen aipatu bezala, ekarpen nagusienetarikoa, nire ustez, harremanak euskaraz sustatzea da. Modu eraginkor batean euskaraz lan egin nahi duten pertsona eta entitateak elkar topatzeko aukera eskaintzen du. Hornitzaileak, bezero berriak, kolaboratzaileak... sarean topa ditzakegu.
Enpresareanek modu eraginkor batean euskaraz lan egin nahi duten pertsona eta entitateak elkar topatzeko aukera eskaintzen du.
Nolakoak izan beharko lirateke elkarlanerako topaguneak?
Enpresarean webgune berriak laguntza eta baliabide interesgarriak ipintzen ditu euskal profesionalen sarearen eskura. Hala ere, ez nituzke alde batera utziko foro, azoka eta horrelako ekimenak. Pertsonen arteko harreman zuzenek garrantzi itzela dutela pentsatzen dut.
LABORAL Kutxan beti sentitu izan gara euskal giroan eta euskararen normalizazioan pauso handiak eman ditugu.
Nolakoa da euskararen erabilera finantza eta negozio munduan?
Tamalez, ez da nahiko genukeen bezain handia. Baina euskaldunok, zorionez, gero eta exigentzia maila altuagoa daukagula esango nuke eta bide horretatik jarraitu behar dugu. LABORAL Kutxan beti sentitu izan gara euskal giroan eta euskararen normalizazioan pauso handiak eman ditugu.
Negozioak eta elkarlana, euskaraz. Zergatik?
Euskaldunak gara, euskaraz pentsatzen eta sentitzen dugulako, lanean euskaraz eraginkorragoak garelako. Gure hizkuntza zaindu eta mantentzeko konpromisoa dugulako. Euskara gure eskubide bat delako.
Bukatzeko... 2018 Enpresarean Azoka. Zein gai mahai gaineratuko zenuke? Norekin?
"Eta euskara, mundu digitalean?" Galdera horri erantzuna eman diezaioketen parte-hartzaileak topatzen saiatuko nintzateke. Online produktuak eta zerbitzuak eskaintzen ditugun enpresak, sare sozialak, bilatzaileak... Zer gertatzen da gure hizkuntzarekin mundu digitalean? Zer egin dezakegu euskal sareak mundu digitalean ere gure hizkuntzaren presentzia bermatzeko?
Izan zaitez ALEAkide!
ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu? Aukera ezberdinak dituzu gure proiektuarekin bat egiteko.