Pentsiodunen plataformak deituta, hainbat mobilizazio izan dira Euskal Herriko hiriburuetan, Espainiako Gobernuak pentsioei %0,25eko igoera minimoa aplikatu izana salatzeko. Artiumetik abiatu da, 19:00etan, Gasteizko manifestazioa Pentsio publiko duinak zioen pankartaren atzean.
Salatu dutenez, %0'25 baino ez dira handitu aurten pentsioak, 2017an Kontsumoaren Prezio Indizea %1’1 igo den bitartean. Zerbitzu Sozialak indartu eta gutxieneko pentsioa 1.080 eurora igotzeko eskatu dute. "Ez dago aitzakiarik, izan ere pentsiodunen erosteko ahalmena, 2011tik hona, %6,5 galdu dugu", salatu dute manifestazioan. Rajoyren gobernuak "inposatutako" %0,25eko igoera ezartzen badute, erosteko ahalmena "gainbehera" joango dela nabarmendu dute. "Ezin da alde batera utzi bizitza duina izateko eskubide eta nahia, kontuan hartzen baditugu lan egindako eta kotizatutako urteak".