Alkoholari buruzko inkesta egin zuen pasa den urtean Arabako Diputazioak Derrigorrezko Bigarren Hezkuntzako 11 eta 17 urte bitarteko 2.023 neraberen artean. Arabako landa eremuko bederatzi udalerritako 14 ikastetxetan egin zuten azterketa.
Alderdi aipagarrienetako bat da neska-mutilen %62k onartu duela alkohola probatu duela noiz edo behin, eta alkohola hartzen hasteko adina, batez beste, 12 urte eta 5 hilabete dela.
Horrez gain, edaten dutenen artean, ohiko kontsumoa oro har txikia bada ere, nerabeen %7,3k egun bakar batean 200 gramo alkohol hartzen duela adierazi du.
Egoera horri aurre egiteko, Diputazioak iragarri du indartu egingo dituela nerabeak alkohola hartzen hasten diren adina atzeratzeko prebentzio programak; besteak beste, familientzako lantegiak antolatuko ditu, arrisku egoeran dauden nerabeekin esku hartzeak egingo ditu eta prestakuntza emango die tabernetako arduradunei.