Aurtengo uzta dastatzen hasiera eman diote Araban sagardoaren denboraldiari. Hitzordua Aramaion izan zen, Iturrieta sagardotegian. Betan, Arabako Sagar eta Sagardogileen elkarteak sagardo berria aurkeztu zuen, ohi bezala, antolatzen duen ekitaldian. Urtero, protagonista berezia izaten du inaugurazioak eta aurten, Alberto Zerain mendizalea omentzeko asmoz, haren senideak eta lagunak izan ziren bertan. Kupelak zabaldu aurretik, Albertoren semeak eta mendiko kide batek Nanga Parbaten hil zenaren omenezko zuhaitza landatu zuten, kanpoan, Anbotora begira.
"Sagar uztarik onena"
Sagardoa dastatzeaz gain, Arabako Sagar eta Sagardogileen elkarteko ordezkari Juanjo Peciñak uztaren kalitatearen berri eman zuen. "Elurrak ez du uzta kaltetu, eta azken 20 urteetako sagar uztarik onena lortu dugu". Beraz, aurten Arabako sagardotegietan egongo den sagardoa "kalitate handikoa" izango dela iragarri dute.
Irudiak: Alex Larretxi