Vithas San Jose ospitale pribatuko langileek 24 orduko greba eguna izan zuten atzo, eta datozen asteotan, protesta gehiago egingo dituztela iragarri dute. Hala, urriaren 25, azaroaren 2an eta 6an ere protesta egunak izatea aurreikusi dute. Guztira, 200 langile inguru daude ospitalean lanean. Langileek salatu dutenez, Araba, Bizkaia eta Gipuzkoan dauden ospitaleen artean, Gasteizkoa da soldata txikiena daukana: "gainontzeko ospitaleetan baino ordu gehiago sartzen ditugu, eta gutxiago kobratzen dugu".
Egoera honen aurrean, hitzarmen kolektibo duina eskatu dute langileek, eta, era berean, enpresak hori negoziatzeko duen "borondate eza" salatu dute. Azaldu dutenez, abenduaren 31n amaitu zen hitzarmena. Enpresak planteatzen duena soldatak igotzea da, baina enpresaren etekinen araberako igoera.
Horrez gain, lanordu kopurua murriztea eskatu dute langileek. Egun 1.700 lanordu dituzte zehaztuta, ospitale pribatuetako kopururik handienetarikoa.