Orain arte sarean nabigatzeko abiadura gutxi izan duten Arabako herri txikiek banda zabala izango dutela iragarri du Jaurlaritzak; izan ere, 10 milioi euro inbertituko ditu, 2019a baino lehen, EAEko 391 biztanlegune txikietan konektibitate osoa bermatzeko. Kasuen %72 Araban kokatuta daude, hala, bertako 280 herri txikiei eragingo die neurria. Zehazki, sare hori 'gune zuri' gisa sailkatutako 1.000 biztanletik beherako biztanleguneetara iritsiko da, hots, Interneten sartzeko zerbitzuak eskaintzeko telekomunikazio-azpiegiturak egon ez eta datozen hiru urteetan egotea espero ez den nekazaritza-inguruneetan kokatutako guneak badira.
Horretarako, telekomunikazio konpainiei zuzendutako diru-laguntza deialdia onartu du Jaurlaritzak. Enpresa esleipendunak diruz lagundutako sarea kudeatu behar izango du, gutxienez, hamar urteetan.