Martxotik maiatzera bitartean 6.227 Asiako liztor harrapatu dituzte, Arabako Foru Aldundiak La Caixa Gizarte Ekintzarekin batera egindako kanpainan. Hala, Ingurumen sailak bi hilabetez tranpak jarri ditu Araba guztian zehar.
Aldundiak La Caixa Gizarte Ekintzarekin izenpetutako hitzarmenari esker finantzatu ahal izan da vespa velutina delakoaren aurkako borroka kanpaina.
Hala, Ingurumen Saileko foru diputatu Josean Galerak kanpaina arrakastatsua izan dela eta "uste baino ale gehiago" harrapatu dituztela adierazi du. Hala ere, oraindik bigarren tranpa fase bat ere badela jakinarazi du, izan ere, liztor erreginez gain, liztor langileak ere harrapatzea dute helburu. Bigarren fase hori irailetik aurrera egingo dute.
Espezie inbaditzailea
Asiako liztorra erleentzat eta beste intsektu batzuentzat mehatxu larria suposatzen duen espezie inbaditzailea da. Arabara 2012an heldu zen, eta geroztik, nabarmen hazi da urtez urte. Iaz 355 habia kendu behar izan zituzten eta 2015. urtean 170 baino ez. 2014ean, ordea, 24 habia kendu zituzten.