Badatoz Arabako herri inauteriak

Erredakzioa 2017ko ots. 1a, 15:39
Ilarduian otsailaren 18an ospatuko dituzte inauteriak. Irudia: Artiz Mtz de Luna

Asteburu honetan Kuartangon hasi eta hilabete luzatuko dira. Ilarduia, Egino eta Andoinen hilaren 18an ospatuko dituzte; Zalduondon 26an, Kanpezun 28an eta Saratsun, martxoaren 4an.

Markitos, lastozko gizona, porreroak, Toribio, hartza... Gertu dira Arabako herri inauterietako protagonistak. Datorren asteburuan hasiko dira Kuartangon eta garai berri bati hasiera emateko ospakizunak hilabete batez luzatuko dira, Arabako zenbait herritan. 2015ean gizateriaren ondare ez-materiala izendatu zituzten Arabako herri inauteriak.

Kuartangon, porreroak Agate Deunan

Urtero bezala, Kuartango izango da herri inauteriak ospatzeko jaian murgilduko den lehen herria. Otsailaren 4an egingo du, Agate Deuna ospatzen den egun berean. Izan ere, traba eta debekuei aurre egiteko, inauterietako ezaugarriak Agate Deuna egunera eraman zituzten herritarrek. Makilekin etxez-etxe joaten dira jakiak eta dirua biltzen, porrero jantziarekin. Horiekin batera, hartza, zakuekin jantzitako maskaratuak, errautsa botatzen duen pertsona eta Arrianoko atsoa izango dira herriko kaleetatik zehar. Arratsaldeko 19:00etan hasiko da jaia.

Ilarduia, Egino eta Andoin, lastozko gizona sutara

Ondoren, Ilarduia, Egino eta Andoin herrien txanda izango da. Bertan, lastozko gizona da protagonista. Gaitz guztien errua leporatzen zaio pertsonaia honi Asparreneko herri hauetan. Asto baten gainean lehenengo, eta idiz jantzitako porreroen bizkarrean ondoren, herrietatik paseatu, eta su ematen diote. Hitzordua otsailaren 18an izango da, 16:00etatik aurrera.

Zalduondon, Markitos sugarretara

Otsailaren 26an Lautadan jarraituko du ospakizuna, zehazki, Zalduondo herrian. Neguko loaldia eta gero udaberriari ongi etorria emateko, hartza agertzen da herritik. Errautsak bota eta erratza pasatzen dute kaleetatik, garbiketa erritu moduan. Gaitz guztien erruduna, Markitos, sutan erretzen dute. Ospakizuna 13:00etan hasiko da.

Kanpezun, Toribio uretara

Kanpezun, berriz, Toribio dute, lastozko panpina; katxiruloek makila batetik zintzilik daramate eta, epaitu eta gero, Ega errekara botatzen dute. Bidelapurra, konjuratzaileak eta putreak dira Kanpezuko kaleetan zehar ibiltzen diren beste pertsonaietako batzuk. Hilaren 28an izango da, 19:00etatik aurrera.

Saratsun, porreteroa teilatura

Añanako Kuadrillako herri honetan oiloak lapurtu eta bestelako gaiztokeriak egiten ditu porreteroak. Lastozko panpin hau epaitu eta gero, jipoitzen dute, eta garbitokiko teilatura botatzen dute putreek jan dezaten. Saratsun martxoaren 4an izango da festa, 19:30etik aurrera.

 

 

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide