Arabako parke naturalen programa desberdinetan eskola ikasleentzako bisita gidatuak sartzen dira, eta adin bakoitzari egokitutako jarduerak. Iaz, 130 eskola talde hurbildu ziren Arabako parke naturaletara; guztira, 6.605 ikasle.Gainera, programan badira herritar guztientzako jarduerak ere (adinduen taldeak, mendi taldeak, aisialdikoak, elkarteak). Proposamen horretan, 6.354 pertsonak hartu zuten parte iaz, 140 taldetan banaturik.
Balantzea aurkeztearekin batera, Arabako Aldundiak hurrengo bi urteetan parke naturaletan programa hauek kudeatzeko kontratu berriaren zehaztasunak onartu ditu. Hala, Ingurumen Sailak lizitazioan eskainiko du kontratua, 1,5 milioi euroan, datozen bi urteetarako. Plantilla handitu, kontratazioko klausula sozial berriak txertatu eta kudeaketa zerbitzuez gain zainketakoak eta jendeari harrera egitekoak ere sarturik, %13 inguru hazi da aurrekontua.
20 langile arituko dira parke naturaletan; haien ardura izango da natura gune horietako flora eta fauna eta habitata zaindu, hobetu eta ezagutzeko ekintzak gauzatzea, halaber, natura gune horien eragin eremuetako ekonomia eta gizarte garapena sustatzeko neurri egokiak abiatuko dituzte. Alde horretatik, parkeen kudeaketan sartzen da orobat erabilera publikoko azpiegiturak eta ekipamendua zaindu eta kontrolatzea, eta bisitariei harrera egitea.