"Lan hitzarmena defendatzeko", lanuzteak deitu ditu IPM taldeko Estampaciones Rubi enpresako langile batzordeak, hilaren 18, 25 eta 26rako. Gasteizen duen lantokiko langile batzordeak deitu ditu, LAB, ELA, ESK eta UGT sindikatuek osatzen dutena.
Mobilizazio hauen bitartez, lan hitzarmena defendatu nahi dute. Era berean, enpresaren zuzendaritzak proposatu dituen "murrizketei eta lan baldintzen prekarizazioari" aurre egin nahi diete langileek. "Enpresak antzinatasuna izoztu nahi digu, errelebo-kontratua kendu, soldata 2015eko baldintzetan izoztu eta kontsolidatu ezin den soldata igoera irabazien lorpenera baldintzatu nahi dute", salatu du langile batzordeak LAB sindikatuak bidali duen oharrean. Gainera, lanuzteak "urtebeteko fruiturik gabeko negoziazio prozesuaren ondoren" deitu direla gaineratu dute. Egoera konpondu ezean, mobilizazio berriak deituko dituztela azaldu du langile batzordeak.
Rubi enpresak pieza metalikoak ekoizten ditu autogintza enpresentzat, besteak beste, Mercedes, SEAT, Citroen, Opel eta IVECOrentzat. Guztira, 180 behargin inguru ditu enpresak Gasteizko egoitzan.