Arabako Foru Aldundiak 2017an aurten baino % 3,6 (75 milioi euro) gehiago biltzea aurreikusten du. Gorakada hori lan atxikipenek, BEZak eta zerga bereziek, hala nola, gasolioarenak, gora izanaren ondorioz izango dela uste du.
Izan ere, gaur goizean Ramiro Gonzalez diputatu nagusiak argi utzi du "ez dela ez murrizketarik ez doiketarik egongo 2016ko aurrekontuetan". Ildo berean, Arabako toki erakundeei lasai egoteko esan die, TEFFF bidez jasotzen dituzten baliabideek ere ez dutelako murrizketarik izango.
Izan ere, Gonzalezen hitzetan, Arabako Foru Aldundiak, 2016an, 2.054,5 milioi euro biltzea espero du. Hau da, iaz baino % 3,1 (61,4 milioi) gehiago. Dena dela, gorakada hori ez da aurreikusitakora (% 5,5) heltzen.
"Erreformari heldu behar zaio", EH Bilduren ustez
Datu hauen aurrean, EH Bilduk zerga erreformari heldu behar zaiola errepikatu du. "EAJk, PSEk eta PPk sinatu zuten zerga erreformak ezin ditu emaitza onak eman, porrot egin du eta erreformari heldu behar zaio. Azken urteotan bezala, aurreikuspenak ez betetzea ez da desbideraketa txiki bat. Arabak 50 milioi gutxiago izango ditu eta horrek nahitaez murrizketak ekarriko ditu", azpimarratu du Kike Fdez de Pinedok, Arabako EH Bilduko bozeramaileak.