Gasteizen 54 hegazti hil dituen botulismo agerraldia kontrolpean dute erakundeek

Erredakzioa 2016ko ira. 21a, 13:35

Alerta goiztiarreko sistemak galarazi egin du hildako hegaztiak 2014ko kopurura heltzea, orduan 739 hegazti hil baitziren.

Gasteizen ia 60 hegaztirengan eragina izan duen botulismo agerraldia kontrolpean dagoela adierazi dute Arabako Foru Aldundiak eta Gasteizko Udalak. Joan den abuztuaren 21ean hildako lehenengo hegaztia agertu zen Iparraldeko parkean eta geroztik, hainbat espezietako 54 hegazti hil dira Salburuko hezegunean nahiz Iparraldeko eta Arriagako parkeetako urmaeletan. Era berean, lau hegazti Martiodako Basa Fauna Suspertzeko Zentroan daude oraindik, bilakaera ona dute eta tratamenduaren ondorio egokiak ageri dituzte.

Uda honetan ezarri den alerta goiztiarreko sistema berriari esker, ekiditu dute 2014ko udaren bukaera aldeko kopuruetara heltzea, orduan 739 hegazti hil baitziren. "Uda honetan agerraldi berria izateko aukeraz jabeturik, alerta sistema hau aktibatu genuen eragindako hegaztiak berehala erretiratzeko eta, ahal zenaren neurrian, gaixotasunaren hedapena galarazteko", azpimarratu du Ingurumen Saileko foru diputatu Josean Galerak.Beste aldetik, Gasteizko Udaleko Ingurumeneko zinegotzi Iñaki Prusillak  erakundeen arteko lankidetzak agerraldia benetan kontrolatzeko duen garrantzia nabarmendu du.
 

Euria eta tenperaturaren jaitsiera, lagun

 Gasteizen azken egun hauetan izandako euriak eta tenperaturaren jaitsierak bi erakundeei pentsarazten diete botulismo agerraldia dagoeneko kontrolaturik dagoela, batez ere kontuan izanda irail honen 16az geroztik ez dela agertu hildako hegaztirik. Hala ere, bai Aldundiak, bai Udalak, prebentzio moduan, mantendu egingo dute Salburuko hezeguneetako eta hiriko urmaeletako jagoletza sistema.

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide