Miñaoko parke teknologikora joateko autobus zerbitzua hobetuko dute. Izan ere, gaur goizean Tokiko Gobernu Batzarrak onespena eman dio Arabako Foru Aldundiaren, Gasteizko Udalaren eta Arabako Teknologia Parkearen arteko lankidetza-hitzarmenari, industrialde horretarako garraio publikoa hobetzeko.
Teknologia parkerako autobus lineak bi ibilbide izango ditu Gasteiztik irtetzeko (ekialdea eta mendebaldea). Guztira 15 geldialdi izango ditu hirian zehar, eta beste 8 geldialdi teknologia parkera iristeko. Itzuliko ibilbideak eskema berari jarraituko dio. Maiztasunari dagokionez, 14 zerbitzu izango dira , 07:10etik hasita 19:00etara.
Hitzarmen honen bitatez, Udalak konpromisoa hartzen du Miñaorako garraio erregularraren finantzaketan ekonomikoki parte hartzeko, urtean 20.000 euroko gehienezko muga jarrita; baita Teknologia Parkeari laguntzeko ere zerbitzua hobetzeko ibilbideak eta egutegiak diseinatzeko, eta garraioa normaltasunez garatzeko beharrezko diren administrazio baimenak errazteko.