Uda honetan 158.619 bisita jaso dituzte Garaio eta Landako hondartzek eta Mendixurko parkeak, Arabako Foru Aldundiak jakinarazi duenez.
Ekainaren 11tik irailaren 4ra arte luzatu den udako kanpainan Landako hondartza izan da bisita gehien jaso duena, guztira 93.264 lagun bertaratu baitira. Garaioko bi hondartzek, bestalde, 65.022 lagunen bisita jaso dituzte, eta Mendixurko parkeak, aldiz, 336 lagunen bisita.
Udako kanpainaren balantzea egiteko orduan, Garaioko Informazio Bulegoan izandako bisitak era kontuan hartu dituzte. Informazio eske gerturatu ziren 2.629 lagunetatik, % 8 baino gehiago atzerritik zetozen. Hala ere, bisitarien erdia baino gehiago Euskal Autonomia Erkidegotik etorri zen (550 arabar, 562 bizkaitar eta 453 gipuzkoar).
Bizikletak maileguan uztea
Bizikleten mailegua izan da aurtengo kanpaina egin den eskaerarik handiena, izan ere, aurten, Aldundiak bizikletak maileguan uzteko zerbitzua eskaini du; aurten, 1.198 lagun izan dira guztira bizikleta eskatu dutenak, eta horietatik % 37 adingabeak ziren.
Era berean, udan zehar, pertsona askok parte hartzen du urtegiko parkeetako ingurumen heziketako proposamenetan. Zehazki, Mendixurko parke ornitologikoko interpretazio ibilbideetan, hezkuntza tailerretan eta udako tailerretan, 906 lagun izan dira.