Gasteizko txosnek abuztuaren 4an zabalduko dituzte ateak. Inaugurazioa, 20:30ean izango da eta zinta-mozketa egin ondoren, txosnaz txosnako pintxo-potea egingo dugu, Ttek! elektrotxarangak girotuta.
Ondoren, 21;30ean Karpa Komunean urteroko Txosnisaria banatuko dute. Aurten, Errekaleor Bizirik elkarteak jasoko du, autogestioaren alde eginiko lanagatik. Izan ere, urtero banatzen duten sari honen bitartez, txosnak osatzen dituzten kolektiboek herrigintzan nabarmendu diren pertsona edo eragileak omendu nahi izaten dituzte.
5 txosna, 3 karpa eta karpa komuna
Aurten bost txosna, hiru karpa eta karpa komun bat egongo dira unibertsitate eremuan. Bi espazio nagusiez gain (karpa komuna eta agertoki nagusia), Gazte Karpak ere bere programazioa izango du. Berrikuntza gisa, herri-mugimenduaren materiala salgai izango da, herri-dendan. Gainera, karpa nagusian afaltzeko aukera ere berreskuratu dute eta elikagaien bankuari emango diote bertan kontsumitzen ez dena.
Urtero bezala, egun bakoitzak izaera berezia izango du. Abuztuaren 6an, esaterako, entxosnazio eguna ospatuko dute. Egun berezi hori euskaraz bizitzearekin lotu nahi izan dute aurten, "txosnetan murgiltzea euskaraz bizitzea dakarrela ulertzen baitugu". Gazte eguna abuztuaren 7an ospatuko dute, 8an ikasle eguna, eta 9an, azkenik, egun feminista. Horrez gain, abuztuaren 4an Ai laket-eko lagunek droga testajea egingo dute eta egunero Gasteizko Mugimendu Feministaren jaima izango da.
Eraso sexisten gaitzespena
Era berean, betiko izaerari jarraituko eutsiko diote txosnek eta "jai-eredu euskaldun, parekide, anitz, parte-hartzaile eta herrikoiaren aldeko apustu garbia" egingo dutela azaldu dute gaurko prentsaurrekoan.
"Zentzu honetan, eraso sexisten gaitzespena eta berdintasunezko harremanen aldeko apustua egin nahi dugu. Gure egiten dugu Gasteizko Mugimendu Feministaren protokoloa eraso sexisten aurka eta, eraso horien aurrean, autodefentsarako deia egiten diegu emakume guztiei, eta oro har, jendarte osoari, jai-gunean gerta litekeen edozein erasoren aurrean batera erantzuteko. Protokoloa aktibatzeko mekanismoak prest ditugu, eta ez dugu zalantzarik egingo hori abiarazteko". Horrez gain, erasoak salatzeko telefono zenbakia eskura jarri dute: 688 852 901
Txosna berde eta ekologikoa
Txosna-gune osoan edalontzi berrerabilgarri eta birziklagarriak baino ez dira egongo. Aurten ere produktu ekologikoen eta elikadura-subiranotasunaren aldeko apustua egin du Txosna Batzordeak, eta txosna guztietan izango da produktu ekologikoren bat dastatzeko aukera. Horrez gain, Entxosnazio Eguneko herri-bazkaria ere Arabako produktu ekologikoekin egingo da.
Euskara, konplexurik gabe
Azkenik, euskaraz ikasten ari direnei euskaraz beldurrik eta konplexurik gabe hitz egiteko gonbita luzatu diete Gasteizko txosnetako kolektiboek. "Horretarako dekalogoa osatu du euskararen aldeko Gasteizko herri-mugimenduak, eta horrekin bat egiten du Gasteizko Txosna Batzordeak, jaietan ere euskaraz bizi nahi dugulako".
Egun, 10 kolektibok osatzen dute Gasteizko txosnek: AEK, Askapena, Gazte Karpa, Fracking Ez-Feministok Fest, Iraultza 1921, Presoen Lagunak, Gasteiz 2011, Hala Bedi, Arabako Bertsozaleen Elkartea eta Sukalde-gerrilla.
Egitaraua, egunez egun
Abuztuak 4, osteguna
20:30 – Txosnagunearen irekiera eta pintxo potea
21:30 – Irekiera-ekitaldia. Txosnisaria
22:30 – The capaces
00:00 – La gran pegatina
02:30 – Itaca Band
Abuztuak 5, ostirala: PRESO ETA IHESLARIEN EGUNA
15:00 – Herri-bazkaria Landatxon
21:30 – Preso eta iheslarien eguneko ekitaldia
22:30 – Tajon prieto y los kuajalotes
01:00 – Akerbeltz
03:30 – DJ Elepunto
Abuztuak 6, larunbata: ENTXOSNAZIO EGUNA
13:00 – Bertso-ardo-kata
14:30 – Bazkari herrikoia
17:00 – Dantza-plaza, umeen jolasak, magoa, ginkana, puxikak…
18:30 – Antzerkia
00:00 – Eskean Kristo
02:00 – En Tol Sarmiento
03:30 – Pintxa Croquette 82
Abuztuak 7, igandea: GAZTE EGUNA
14:30 – Gazte-bazkaria
22:30 – Niña Coyote Chico Tornado
00:00 – Lágrimas de sangre
02:00 – Green Valley
03:30 – DJ Loro & Selektah Stepi
Abuztuak 8, astelehena: IKASLE EGUNA
14:30 – Ikasle-bazkaria
16:30 – Bazkalondo girotua
22:30 – Montauk
00:00 – Capsula
02:00 – Willis Drumond
03:30 – DJ Rokakolo
Abuztuak 9, astertea: EGUN FEMINISTA
18:30 – Transzeledontziaren jaitsiera Andre Maria Zuriaren plazan
20:30 – Jolasak: matxirulo sin piñata + Antzerkia: Ovarios verdes fritos
21:30 – Afari feminista
22:30 – Ane Guria
00:00 – Zoo
01:30 – Las Tea Party
03:30 – DJ Raybon