Udazkenera bitartean, Iñigo Royo artistaren Beti barrez dagoena erakusketa egongo da Artiumen ikusgai, "elkarrekin biziz sortzen dugun iskanbila ergelari" eta "ikuskizunari begira (…) agertzen zaigun barre saminari" buruzkoa, hain zuzen ere. Bertan, instalazioak, bideoak, argazkiak eta soinudun pieza bat aurkituko ditu ikusleak; eta baita Royok ohikoak dituen literaturaren aipamenak, eta eguneroko errealitatearen zenbait alderdiri buruzko begirada ironiko eta eszeptikoa ere, hasi politikatik eta teknologia berrietaraino.
Artiumek ekoitzi du erakusketa, eta katalogo bat ere argitaratu du, artistaren, Santiago Erasoren eta Jose Luis Arantegui idazlearen testuak bildu dituena. Udazkenean, gaiari lotutako zinema-ziklo bat eskainiko da.