Lau alderdik aukeratu dute Gasteiz kanpaina ekitaldi nagusiak egiteko

Erredakzioa 2016ko eka. 9a, 14:10

Artium, Zaramaga, Bastiturri, Florida parkea eta Andre Mari Zuriaren plaza aukeratu dituzte alderdiek lehenengo ekitaldietarako.

Arabako botoek izango duten garrantziaz jabetuta, EAJk, PSE-EEk, Elkarrekin-Ahal Duguk eta PPk Gasteiz aukeratu dute kanpainako lehen ekitaldi nagusia egiteko. EH Bilduk ekitaldia egingo badu ere, ekitaldi nagusia Irunen egingo du.

PP izango da goiztiarrena, 19:00etan, Artiumen. Espainia serioski, orain inoiz baino gehiago! da aukeratutako leloa eta EAEko hiru zerrendaburuak izango dira: Alfonso Alonso, Leopoldo Barreda eta Borja Senper.

Ondoren helduko dio PSE-EEk, 20:00etan, Zaramaga auzoan (Nafarroako erregeak kalea). Baiezko bat aldaketarako leloa aukeratu dute kanpainarako, eta Idoia Mendia idazkari nagusia eta hiru zerrendaburuak izango dira: Patxi Lopez, Javier Lasarte eta Odon Elorza.

Ordubete beranduago, 21:00etan, Bastiturri kalean emango dio hasiera kanpainari EAJk. Lehenik Euskadi leloa buru, Iñigo Urkullu Jaurlaritzako lehendakaria, Andoni Ortuzar EBBko presidentea eta hiru zerrendaburuak izango dira ekitaldian: Aitor Esteban, Mikel Legarda eta Joseba Agirretxea.

Ordu berean, Elkarrekin-Ahal Dugu koalizioak lehenengo kanpaina izango du. Gasteizko Florida parkea aukeratu dute horretarako. Herrialde baten irribarrea goiburu hartuta, Ahal Duguko, Ezker Anitzako eta Equoko buruak ariko dira: Nagua Alba, Isabel Salud eta Juantxo Lopez Uralde.

EH Bilduk Irunen (Gipuzkoa) egingo du kanpaina hasierako ekitaldi nagusia, 20:00etan, Arnaldo Otegi lehendakaritzarako hautagaia, eta Marian Beitialarrangoitia eta Oskar Matuterekin batera. Gasteizen, baina, Arabako ekitaldia izango dute, 20:00etan, Andre Mari Zuriaren plazan; Eva Lopez de Arroyabe eta Mikel Otero hautagaiak izango dira bertan.

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide