Uztailaren 28an 100 urte beteko dira Heraclio Fournier hil zenetik eta bere iloba Felix Alfaro Fournierrek naipeen enpresa gasteiztarraren sortzailearen izena daraman bilduma abian jarri zuenetik. Bi urteurren hauek ardatz hartuta, Bibat museoak eta Arabako Foru Aldundiak jardueren egitaraua zabala antolatu dute. Besteak beste, erakusketak, musika eta magia eskainiko du programa honek.
Aste honetan bertan, Heraclio Fournier. 100 urte geroago erakusketa zabaldu ditu ateak. Hasiera batean, Gasteizen ikusteko aukera izango da, baina ondoren erakusketa ibiltaria izango da eta Agurain, Guardia, Amurrio eta Varonatarren etxera mugituko da.
Larunbatean, esaterako, musikarekin ospatuko dute urteurren berezi hau Traspaso kultur elkarteak ikuskizuna eskainiko du Plaza Berrian eta museoan bertan. Horrez gain, ekainean bisita magikoak egingo dituzte, Arabako Ilusionisten elkartearen eskutik.
Egitarau osoa: Heraclio Fournier, 100 urte geroago
Bildumaren historia
Garrantzi berezia izan zuen 1970ean Thomas De La Rue-ren bilduma enkantean erosteak. Ordura arte, Londresko British Museum-en gordailatuta egon zen bilduma hori. Horren erosketarekin, Europan gordetzen diren ale zaharrenetako batzuk jaso ziren.
1984an, Arabako Foru Aldundiak bilduma erosi zuen eta Arabako Arte Ederren Museoko zenbait aretotan ikusgai jarri zuen. Harez gero, funtsen gehikuntza eta erakusketa beharrizanak zirela eta, bilduma Bendaña jauregian eraman zen. Jauregi hau 1994 urtetik aurrera Arabako Fournier Karta Museoaren egoitza da.