Udan Txernobyl (Ukrania) inguruko 50 ume inguru hartuko ditu Arabak. Horietako 36 haur hilabete bat egongo dira harrera familiekin eta gainontzeko 14ek bi hilabetez luzatuko dute egonaldia, Arabako Aldundiak baieztatu duenez. Guztira, 17.600 euro bideratuko ditu foru erakundeak jarduera hau gauzatzeko, harrerak kudeatzen dituzten elkarte arabarrekin sinatutako hitzarmenen bitartez.
30 urte istriputik
Aurten 30 urte bete dira Ukraniako zentral nuklearraren istripu larria gertatu zenetik eta atzo Gobernu Kontseiluak hondamendi nuklearraren inguruko adierazpen instituzionala onartu zuen. "Gaurko egunez, duela 30 urte, historia nuklearrean izan den istripurik larriena gertatu zen; gizakiak ezagutu duen ingurumen ezbeharrik handienetakoa, milaka lagunen bizitza betiko aldatu zuena. Gaur egun oraindik nabari dira erradiazioaren ondorioak".
Izan ere, inguruan bizi zirenei eragindako kalteak aipatu ditu foru erakundeak eta ildo horretan, 1996. urteaz geroztik bertako haurrak etenik gabe hartu dituela gogorazi du adierazpen horretan, "ahal den neurrian zentral nuklearraren eztandaren ondorioak arintzeko xedearekin".
"Urte horietan guztietan harrera proiektuari eutsi izanak ahalbidetu du, ezbeharra gertatu zenetik 30 urtera, mediku arreta ematea harreran hartutako haurrei, alderdi fisikotik eta emozionaletik lehengoratzeko behar duten ongizatea areagotzea eta kultura trukea sustatzea, Arabako familiekiko eguneroko elkarbizitzaren bidez".
Garoña behin betiko ixtea
Horrez gain, Kontseiluak babesa eman die hondamendiaren eragin zuzena jasan duten haurrak hartzeko ekimenei, eta Garoñako zentral nuklearra behin betiko ixtea defendatzeko konpromisoari eutsi egin dio.