Gasteizko aireportua sustatzeko VIA sozietateari 500.000 euroko diru-laguntza ematea onartu du gaur goizean Eusko Jaurlaritzak. Zehazki, Forondako pasaia-eragiketak sustatzeko ekintzak finantzatu eta Arabako zein autonomia-erkidegoko jarduera turistikoa bultzatzeko bideratuko da diru-laguntza hau.
Eusko Jaurlaritzak gogorarazi duenez, VIAren helburua aireportua sustatzea eta garatzea da, aire-bidezko garraiorako, industria aeronautikorako eta pertsonak garraiatzeko gune den aldetik. Helburu du, halaber, garraio-lanetan diharduten sozietateetan parte hartzea, modalitate guztiak kontuan hartuta (logistikoa, zamaketak, hustuketak eta karga mugitu eta finkatzekoak).
"Sozietateak zailtasunak dituenez epe laburrean helburu zenbagarriak lortzera bideratu behar dituen baliabideak eskuratzeko, beharrezkoak dira bazkideen ekarpenak; hala bada, Euskal Autonomia Erkidegoko administrazio orokorrak 500.00 euroko ekarpen beharrezkoa egin du, pasaia-eragiketak eta turismo nahiz merkataritza jarduerak bultzatzera bideratutako ekintzak finantzatzeko", azaldu du.