Moschinoren azkeneko emakumeentzako kolonia garestia eta merkearen arteko dikotomiari aurre egin nahi dio; luxuaren eta ohikotasunaren nahasketa izan nahi du. “Lurrin honen kontzeptua produktu arrunt eta baliogabeko bat preziatua den beste batekin batzea da”, esan du Jeremy Scott markaren diseinatzaileak. Horren ondorioz, Fresh lurrina atera du arropa marka italiarrak. Honaino, dena zuzen. Polemika dator ontzi arrunt eta baliogabe hori kristal-garbigarri baten itxurakoa delako, horrek kontzeptuari beste kutsu bat ematen baitio.
Ez da emakumeen irudiaren kontura publizitatea lortzen duen lehenengo marka. David Delfinek bere desfilean modeloak poltsa batekin buruan eta soka bat lepoan aurkeztu zituen, mendeetan zehar emakumea ergela, sinplea, menpekoa eta objektua bezala erakutsi duten milaka publizitate kanpaina ez aipatzearren.
Batzuentzat generoen estereotipo sexistak baliatzen dituen ontzia dena, besteentzat diseinu berritzailea izan daiteke. Gauza da azkenean emakumeak beti sartuta daudela horrelako polemiketan. Ez al dago beste forma bat arreta deitzeko? Ez al dago beste ontzi arrunt eta baliogabe bat lurrina merkaturatzeko?