Arabako Foru Aldundiak aireko argazkiak egingo dizkie drone baten bidez lurralde historikoko herrigune guztiei. Tresna horren bidez, errazagoa izango da hirigintza plangintza. Gainera, argazki hauek Ingurumen eta Hirigintza Sailak lehendik dauzkan kartografia eta ortoargazkiei batuko zaizkie.
Gainera, lan honi esker Arabako herriak ikuspegi berri batetik ikusteko aukera izango dute arabarrek, goitik begiratuta, hain zuzen ere. Airetiko irudi kalitate handiko argazki hauek herritarren esku utzi ditu Aldundiak. Dagoeneko doan jaisteko moduan daude lehenbiziko argazkiak, www.araba.eus webgunean. Zehazki, 14 udalerritako 125 herrigune dira (Dulantzi, Añana, Asparrena, Aiara, Berantevilla, Kanpezu, Lantarón, Okondo, Urizaharra, Agurain, Donemiliaga, Gaubea, Zanbrana eta Zigoitia). Datozen hilabeteetan, eskura egongo dira gainerako herri eta udalerrietako argazkiak ere.