Aurtengo
Arabar jatorriko euskal amerikarra izanik, Boisen exotikoa zarela esan daiteke, izan ere, ez dugu beste inoren berri izan… Ba al dago?
Nik dakidala ez dago bertan jaiotako jatorri arabarreko beste inor. Idahoko euskal amerikar gehienak bizkaitar jatorrikoak dira eta Kalifornia eta Nevadan Iparralde eta Nafarroakoak.
Araba ezagutzen duzu?
Umetan uda askotan Agurainera joaten ginen. Zazpi urte nituen joan nintzen lehen aldian. Ostean ia hiru urtez Gasteizen bizi izan nintzen, institutuko 2. eta 3. ikasturteak bertan egin nituen. Oso zorteduna naiz nire arbasoen kultura, erroak, ingurua… lehen eskutik ezagutzeko aukera izan dudalako.
Zure arbasoek euskaraz egiten zuten? Ikasi nahiko zenuke?
Aseginolazatarrak berez Idiazabalgoak gara, gure birraitona hangoa zen eta euskaraz egiten zuen. Agurainera joatean egiteari utzi zion eta denborarekin gure familian euskara galdu zen zoritxarrez. Gaur egun pozik nago egoera aldatzen ari delako, bertako lagunek euskaraz egiten dutela ikusteak ilusio
handia egiten dit. Hemen zorionez ikastola eta helduentzako euskara ikastaroak ditugu, asko gustatuko
litzaidake ikastea, baina momentuz ez dut aukerarik izan.
Zer nabarmenduko zenuke aurtengo Jaildiz?
Ederra izan da, aspaldian ez naiz Euskal Herrian egon eta, aldeak alde, bertan egon izan banintz bezala sentitu naiz, giroa itzela izan da. Sinestezina da hainbeste urte igarota eta milaka kilometroko urruntasuna tarteko ohiturei horren sendo eustea. Giro euskaldun eta yankiaren uztarketa bikaina da Jaialdi, gero eta jende gehiago erakartzen duena. Etorkizunean handitzen eta hobetzen jarraitzea espero dut, plaza ezinhobea da euskal kultura komunitate internazionalean erakusteko.
Nola bizi duzu Euskal Herria urruntasunetik?
Euskal Herria nazio modernoa dela uste dut, izaera, ohiturak eta kultura mantenduz etorkizunera begira dagoena. Europako herri berdingabea izan da eta izaten jarraitzen du.
Egilea: Ane Pedruzo
Erreportaje osoa: Araba Far Westen