San Antonio kaleko bulegoen alokairuaren afera salatu eta erantzukizuna eskatzeko Bulegoen alokairua eskaintza publikorik egin gabe aukeratu zuten eta, gainera, alokairua udal teknikariek zehaztutakoa baino %80 garestiagoa izan zen. Urtebete lehenago Gonzalo Antonek 2,7 milioi euroren truke eskuratu zituen bulegoak, eta 2007an, berriz, Udalak enpresariarekin alokairua sinatu zuen, hogei urterako kontratuak 7,6 milioi euroko kostua izan zuen. Halaber, bulegoetako egokitze lanak udalak ordaindu zituen.
Horiek horrela, Espainiako Kontu Auzitegiak deklaratzera deitu ditu bihar, Alonso eta Maroto, zein kontratua sinatu zenean gobernuan zeuden beste zenbait zinegotzi. Alokairu kontratu hura «irregulartasun» baten ondorioa izan zela leporatuta, 440.000 euro eskatu dizkie. Hala ere, ustelkeriaren kontrako elkarteak bere Twitter profilaren bitartez adierazi duenez, Alderdi Popularreko abokatu batek ordezkatuko ditu guztiak bihar Madrilen. Beraz, “Alfonso Alonsok, Javier Marotok, Alfredo Iturrichak, Marian Castellanosek, Jorge Ibarrondok, Idoia Garmendiak, Encina Serranok, Fernando Aranguizek ezta Miguel Angel Echevarriak ere ez dutela azalpenik emango” ohartarazi du Adi elkarteak.
Zentzun berean, EH Bilduk Arabako Fiskaltzari auzia bere gain hartzeko eskatu dio “oraindik ere kontu asko daudelako argitzeko alokairu kontratuaren inguruan”.
Azkenaldian Gasteizen publiko egin diren ustelkeria kasuen inguruko kezkak elkartu dituen herritarrak batzen ditu Adi elkarteak. “Salatu beharrekoak salatu eta arazo hauei irtenbideak bilatzeko alternatibak proposatzeko” helburuarekin egiten du lan ustelkeriaren kontrako elkarteak.
Argazkia: Adi elkartea
Honen inguruko albiste gehiago:
San Antonio bulegoen kontratua aztertuko du Espainiako Kontu Auzitegiak
Irregulartasunak salatu dituzte Gasteizko Udalean