Arabako Fiskaltzak kereila kriminal bat aurkeztu du Hiriko ibilgailu elektrikoa sustatu zutenen kontra.Iosu Izagirre Arabako fiskal nagusiak iazko uztailean hasi zuen ikerketa eta aurki, horren ondorioak igorri dizkio epaileari. Besteren artean, diru funts publikoak bidegabeki erabiltzea, dirua zuritzea, administrazioari iruzur egitea eta dokumentuak faltsutzea bezalako delituak egotzi dizkie Hiriko autoaren sustatzaileei.
Orain, epailearen txanda izango da. Dokumentazio guztia Gasteizko Instrukzio Auzitegiko hirugarren epaimahaiko epailearen esku dago; hortaz, berari dagokio auzibiderik hasiko duen edo ez erabakitzea.
Euskal Herriko enpresa talde batek eta MIT Massachusset Institute of Tecnology-k abiatu zuten Hiriko eta hainbat diru laguntza jaso zuen. Espainiako Gobernuak 15 milioi euro eman zizkion eta Eusko Jaurlaritzak beste 2,7 milioi euro. Lehen ibilgailuak 2013rako egon behar ziren, baina urte horretan bertan produkzioari aurre egiteko finantzabiderik ez zeukatela argudiatuta proiektua bertan behera geratu zen.
Epsilon egitasmoarekin gertatu bezala, Legebiltzarrak ikerketa batzordea abiarazi zuen iaz Jaurlaritza eta administrazio publikoek nola jardun zuten ezagutzeko helburuarekin. Batzordea amaituta, Arabako fiskal nagusiak hartu zuen lekukoa, gaur arte.
Iturria: Berria.eus