Izan ere, plaza eraberritzeko lanak hasi dira dagoeneko. Momentu honetan , aldamio guztiak kentzen ari dira, auzokide batek bidali dizkigun irudiek erakusten duten moduan. Momentu honetan, bi garabi erraldoi ari dira plaza estaltzen duen kupula kentzen.
Plazan kokatuta dauden eraikinekiko lotura plano inklinatu samar batez moldatuko da: katedrala, atxikitako kapera, parrokia eliza, eta apaizgaitegi zaharra. Arrapala eta eskailera batzuek lotuko dute San Markos kantoia plazarekin.
Zuhaitzak eta eserleku jarraitu bat ere jarriko dira. Sei masustondok osatutako itxituraren bidez, klaustro bat irudikatuko da. Plazaren erdian iturri apaingarri berria ipiniko da, hiriari eta katedralari buruzko idazkunak eta marrazkiak izango dituena.
Zoruan granito grisezko zoladura jarriko da, hiriko inguru horretako beste leku batzuetan bezala.