Magiaren agertoki bihurtuko da Gasteiz, berriro ere, irailaren 15etik 21era bitartean. Astebetez, ekitaldi ugari eskainiko da Magialdia jaialdiaren XXVI. edizioan. Urte batzuk dira Magialdia elkartasun gala antolatzen hasi zenetik, eta aurtengoa, Stop Sanfilippo elkarteari egokitu zaio. Sanfilippo sindromea haurren alzheimerra bezala ere ezaguna da eta honen inguruan ikertzen ari da Gurutzetako Ospitaleko Pablo Sanjurgo medikua. Irailaren 20an izango da elkartasun gala Vital Kutxa Fundazioaren aretoan (Dendaraban) eta bertan Nacho Diago mago valentziarrak ‘Dias de nocilla y magia’ ikuskizuna eskainiko du. Sarrerekin lortutako etekinak aipatutako elkartera bideratuko dira.
Bestetik, magia ibilaldien bitartez ilusionismoa hurbiletik ikusteko aukera egongo da, kamerarik gabe eta jende gutxirekin. Betiko lekuetara –Sokaren Etxea, Bibat museoa eta Ortzairen aretoa– beste agertoki bat gehitu da aurten: Goiuri jauregiko Erdi Aroko dorreko aretoa.
Gainera, aurten, Ignacio Aldecoa kultura etxearekin batera zenbait ekintza antolatu dira. Kultura etxeak magiari buruz daukan liburu bilduma handia aprobetxatuz, irailaren 8tik aurrera, magia funtsei buruzko irakurketa gida bat eskainiko zaie erabiltzaileei. Magiarekin lotutako antzinako kartelen erakusketa ere jarriko da bertan.
Azkenik, irailaren 13an, haurrentzako magia saioa izango da Ignacio Aldecoa kultura etxeko atzealdean, uraren lorategi sekretua delakoan. ‘Magas antiguas y modernas’ emanaldia ez ezik, liburutegian bildutako zenbait lanen egileekin mahai ingurua ere egingo da.
Informazio gehiago: Magiladia XXVI. jaialdia Internazionala