Javier Maroto alkatearen erabaki honek kritika ugari eragin ditu. Izan ere, hiritarrek sare sozialek erabili dituzte erabaki honen kontrako iritzia azaltzeko eta dagoeneko Euskaltzaindia plazan eraikitzen ari diren autobus geltokiari Martxoak 3 deitzeko sinadura bilketa martxan jarri dute Change.org web gunean. Momentuz, 4.8000 sinadura inguru bildu ditu plataforma honek.
Martxoak 3 elkarteak bere ezinegona adierazi du prentsa ohar baten bidez eta Adolfo Suarezek Gasteizen ez duela inolako omenaldirik merezi azaldu du eta “probokaziotzat” jo du udalaren erabakia. Elkartearen esanetan, martxoan 3an hirian gertatu zenaren arduradun politikoa da Adolfo Suarez eta egun Argentinan zabalik dagoen ikerketan auzitara eramatea eskatu ez badute, “hilda dagoelako da”. Horrez gain, Javier Maroto alkatearen “hipokrisia” salatu du Martxoak 3 elkarteak, martxoaren 3an biktimen omenaldian parte hartu ostean, sarraski hura agindu zutenak goresten baititu, “hauen zigorgabetasuna bermatuz”.
Horrekin batera, udalaren oposizioak alkatearen erabaki hau gogor kritikatu du eta EAJ, PSE eta EH Bildu taldeak autobus geltoki berria Adolfo Suarez deitzeko erabakiaren aurka agertu dira.