Bizitzaren onenean
eten da hari hauskorra,
bizitzaren onenean
joan zara, Sabin jatorra!
Maitea zaitugunontzat
izan da kolpe gogorra,
bihotz barnean samina
ta eztarria lehorra.
Baina kantuan nahi dugu
eskaini gure agurra,
pozik nahi gaituzu ikusi,
zein sentimendu ederra!
Hitzez ta kantuz oroituz
hain bizitza emankorra,
hitzez ta kantuz ordaindu
zurekin daukagun zorra!
Ezagutu zenituen
artzelako ilunpeak,
ezagutu zenituen
torturak eta kateak,
soinean izan dituzu
han jasotako kalteak,
bainan tinko iraun dizu
ai, askatasun goseak:
frankismoaren aurkako
borroka etengabeak,
gizarte justuago bat
eraiki nahi izateak
beti zintzo, isilean
egin dituzu zureak.
Gure esker on saskiak
dauzkazu bete-beteak
Gizon dotore, lerdena
euskal mendiko haritza
madarikatu nahi dugu
eraman zaituen gaitza.
Herri maite izan zara
herri txikia, anitza,
auzolanean indartuz
herri kultura, hizkuntza,
ozen entzun izan dadin
Euskal Herriaren hitza,
zenbat bilera, debate
zenbat laguntza, ekintza.
Hain emankorra izan da
eraman duzun bizitza,
guk denok jasoko dugu
zure lanaren emaitza.
Gasteizen 2013ko urriaren 19an
Doinua: Habanera
Izan zaitez ALEAkide!
ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu? Aukera ezberdinak dituzu gure proiektuarekin bat egiteko.