Urriaren 17an, ostegunean, Tel Aviveko Maccabik Gasteizen jokatuko duen partidaren harira Indar Baskonia zaletu taldeak eta Sareak (Euskal Herriko Palestinarekiko Elkartasun Sarea) Israelgo delegaritzaren aurkako gaitzespena adierazteko deia egin diete Zurbanoko pabilioira joango diren zaletuei.
Horrela adierazi du Baskonia saskibaloi taldearen denda aurrean emandako prentsaurrekoan. Gaitzespen hori keinu sinboliko, xume eta ikusgarri batez adieraztea proposatzen dute: partida hasterakoan, jokalariak kantxara ateratzen direnean, kantxari bizkarra emanez. Halaber, 19:48 minutuan banatuko dituzten 1000 bandera aireratzeko eta bizkarra emateko gonbitea egin dute, “1948an Israelek abian jarri zuen garbiketa etnikoa salatzeko”, adierazi dute.
Horrekin batera, aste honetan hainbat protesta ekitaldi antolatu dituzte:
Hitzladia: Palestinan izandako brigadisten hitzaldia, asteazkenean, 19:00etan, Garraxi tabernan
Elkarreratze iraunkorra Andra Mari Zuriaren plazan: ostegunean, 12:00etatik 19:00etara
Ekimen horien bitartez “Maccabik 2009an Israelgo armadak burututako "berun urtua" operazioarekin dituen harremanak eta Israelgo kirol enbaxadoreari ematen zaion harrera normalizatua” salatu nahi dute Indar Baskoniak eta Sareak.
SAREA honako eragile hauek osatzen dute: Askapena, Komite Internazionalistak, Sodepaz, Paz con Dignidad, Red Mewando, Palestinarekin Elkartasuna, Iruñea Contra las Guerras, Gazte Mugimendua, Ikasle Abertzaleak, LAB, Sortu, Aralar, Alternatiba, Eusko Alkartasuna.