Sacher tarta

Motzean errateko, eta erraz-erraz ulertzeko, hiru zati-edo dituela erran daiteke; batetik bizkotxoa bera, bestetik erreximenta erdiko trontzoan, eta azkenik txokolatezko estaldura.

Bizkotxoa-edo egin ahal izateko osagaiak, hauexek:

140 gr gurin (sukaldeko hozberoan epeldua, bigun antzean)

110 gr azukre-hauts

banila makiltto erdia

6 gorringo

140 gr ogirin

130 gr txokolate beltz (beltz-beltz...)

6 zuringo (alegia, guztira 6 arrautza desestrukturatu)

110 gr azukre

Eta bizkotxoa bi pausutan eginen dugu. Hasteko, ontzi batean gurina, azukre-hautsa eta banilaren mamia astinduko ditugu, krematsu geratu arte. Horri gorringoak gehituko dizkiogu, banaka eta astintzeari utzi gabe. Nahastura loditsu eta krematsua erdietsiko dugu. Ogirina eman, eta jarrai irabiatzen. Txokolatea urtuko dugu, maria bainuan (izena bera ere irrigarri samarra du, eta nik sutan egin nuen, Mariaren laguntzarik gabe. Mikrouhin labean ere daiteke). Zeharo urturik denean, aurreko nahasturari gehitu. Hori lehenengo pausua.

Bigarrenerako, zuringoei egurra emango diegu, harrotu arte. Orduan azukrea gehituko diogu, eta hagatxoa astintzen jarraituko dugu, zuringo harrotua ondo sendo izan arte (merengea egingo dugu, alegia). Eta hori bigarren pausua.

Momentu honetan zuringoa aurreko nahasturaren gainean jarriko dugu, eta nahastu egingo ditugu bi pausuak. Baina kontu apur batez nahastuko ditugu; irabiatu gabe; goilara batez edo mixerable batez, xuabe-xuabe, nahastura homojeneatu arte (kontua da bizkotxo honek ez duela legamiarik, eta merenge horrek emango diola harrotasuna. Bi oreak elkartzean irabiatu egiten baditugu zuringo harrotua "apurtu" egingo dugu, eta  gehiegi trinkotu daiteke).

Koipeaz eta ogirin apur batez laberatzeko aproposa den ontzia prestatuko dugu, orain arte egindako guztia bertan sartu, eta laberatu egingo dugu. Bertan izango da 50-55 minutuz, 170 graduren bueltan (eta aurreneko 10-15 minutuan utzi labeari zirrikitu bat irekita). Beti bezala, gogoratu labe bakoitza bere amatxo-labe eta aitatxo-labetik datorrela, eta 50 minutu horiek 45 edo 60 izan daitezkeela; ezagutu, beraz, zure labea.

Eta utzi bizkotxoa hoztu dadin. Eta zatitu erditik, horizontalki, doike (niri ogia zerratzeko erabili ohi diren horietakoa gustatzen zait lan horretarako).

Bale. Amaitu dugu aurrenekoa. Bigarrena erraza da, konparaziotan hasita. 200 gr inguru erreximenta (albertxikoarena jatorrian, baina bertze edozein ere, gaizki ez) epeldu egingo dugu kazulatto batean, eta apur bat arintzean bizkotxoaren erdiko trontzo horretan zabalduko dugu.

Eta finitzeko, estaldura. 200 gr azukre, 125 ml ur eta 150 gr txokolate erabiliko dugu horretarako. Ura eta azukrea sutan ipiniko ditugu, eta 6-8 minutuz irakin araziko. Txokolatea Mariaren laguntzaz urtu eta aurreko almibarrari gehituko diogu (gauzak diren bezala kontatu behar, eta nik, zuzenean erantsi nion txokolatea almibarrari). Zera sendo xamar bat lortuko dugu (pentsatzen dut eskarmentuak zerikusi handia izango duela horretan).

Tarta zera-sendo-xamar horrez estaliko dugu, hozten utzi, eta lixto. On egin!!

Eta hiru detailetxo.

Baga; estaldura bere lekuan jartzeko, jarri labeko paper puska batzuk bizkotxoaren bueltan, platera babesten. Eta ez kendu estaldura hoztu eta gogortu arte.

Biga; estaldura (zera-sendo-xamar hori), nahiko sendo baden jakiteko, kontatzen dute, lau bat zentimetroko zeran egurrezko goilara batek zut eutsi behar diola.

Higa; erran dut gorago ogirina noiz gehitu behar den, ezta? ba, errezeta orijinalaren arabera, merengea txokolatedun nahasturari gehitzen diogunean, orduantxe, zuringoaren gainera hautseztatu behar omen ogirina. Niri beldurra eman zidan, ondo nahastuko ez zelakoan, eta arestian deskribatu gisa egin nuen.

Laga; (bai, badakit hiru detailetxo zirela, baina derrepentean akordatu naiz!) tarta honek onartzen duen dekorazio bakarra, Sacher izena bera omen. Zigilua jatorrizko etxeak soilik jarri omen dezake. To ta no!

Sukaldaria: Ximon

Eta ederra izan zen!