Irailaren 28an Soraluzen ospatuko den TopaEguna aurkeztu dute Soraluzeko Pil-Pilean euskara elkarteak eta Euskaltzaleen Topaguneak. TopaEguna Euskaltzaleen jaieguna izatea nahi dutela azpimarratu dute antolatzaileek. Egunak, euskaltzaleen ekarpenaren eskertze eta aldarrikapena izan nahi du, baina baita ospakuntza ere, Euskal Herri osoan zehar, elkarteetan antolatuta dauden euskaltzaleen festa eguna, elkar ezagutza eta trukerako eguna.
TopaEguna ospatzeko Soraluze aukeratu izana ez da kasualitatea izan. “Izan ere, Deba bailarako euskaltzaleak aitzindari izan dira beti euskara elkarteen mugimenduan eta oraingoan ere, Deba ibaitik egin diote Euskal Herri osoari bertaratzeko gonbitea”, azaldu du Jasone Mendizabal Topaguneko zuzendariak.
Egitarauak adin guztientzako eskaintza izango duela azpimarratu dute antolatzaileek. Eguneko ekitaldi nagusia arratsaldeko seietatik aurrera egingo da, bertan Euskal Herri osoko euskaltzaleen topaguneetako ordezkariek parte hartuko dutelarik. Hortaz gain, aisialdiko eskaintza (umeen hiria, hezitzaileen jolasak, berbaprobak, Irrien Lagunak,…), kultur eskaintza (Xero Xiette taldearen erromeria, Kokein eta Gose taldeen kontzertua, bertsolariak, andrabanda feminista,…) eta herri bazkaria antolatu dira. Gainera, Jon Sarasuak irailaren bukaeran argitaratuko duen liburu berriaren aurkezpena egingo du Kultur Etxean.
Euskal Herriko Euskaltzale guztiei egin diete dei antolatzaileek irailaren 28an Soraluzen bildu daitezen.
TopaEguneko egitaraua
11etan: Harrera
12etan: Liburu aurkezpena (hitzaldia): Jon Sarasua
Goizean zehar:
Umeen hiria
Berba probak
Andrabanda feminista
Kantu Jira
Puzgarriak
14,30ean: Herri bazkaria
Bazkalostean:
Irrien Lagunak
Kultur Gindak
Hezitzaileen arteko jolasak
Kalejira
18,00etan: Ekitaldi nagusia
19,00etan: Xero Xiette taldearekin erromeria
22,30ean: Kokein + Gose
