Aurtengo eskaintza akademikoari dagokionez, urritik ekainera euskara ikasteko makina bat aukera eskaintzen dituztela azaldu dute arduradunek, Lakuan, Aranan zein Judimendin. Euskara maila guztiak, titulu homologatuak lortzeko ikastaroak, autoikaskuntza eta taldeentzako ikastaro bereziak, hain zuzen ere.
Hainbat ordutegi izango dira aukeran, goizez zein arratsaldez, asteko egun guztietan eta, gainera, matrikulatzeagatik soilik, doan jasotzen da AIZU! aldizkaria.
“Euskara ikastea errazagoa izan dadin jarraitzen dugu lanean, instituzioen eta gizarte osoaren aurrean helduen euskalduntzeak euskararen berreskurapen eta biziberritzerako duen garrantzia aldarrikatuz. Honela, udal diru laguntzek jarraitzen dute eta, horrez gain, dagoeneko HABEren euskara-mailak eskuratu dituztenentzako diru laguntzak berreskuratu dira”, azaldu dute arduradunek.
Gasteizen ez ezik, Arabako AEKk Zuian, Lautadan (Agurainen, Araian eta Dulantzin), Trebiñun eta Aiaran (Laudion eta Amurrion) ere matrikulazioa zabalik dago.
Egingo al dugu? Gasteizko AEKren kultur programa
Eskaintza akademikoarekin batera, Egingo al dugu? kultur programa eskainiko du Gasteizko AEK-k. Arduradunen esanetan, programa “euskara ikasle eta euskaldun orori euskarazko kultur eskaintza anitza eskaintzeko gogoz sortu zen, eta helburu berari eutsiko diogu aurten ere. Eskaintza honen barruan kokatzen ditugu neguan eta udaberrian egiten ditugun barnetegi txikiak eta ikasturte osoan zehar burutzen diren gai desberdineko tailer eta hitzaldiak”.
Hiriko gizartetxe, auzo elkarte eta ostatu askotan burutzen dira eta, ikasleentzako ez ezik, gasteiztar euskaldun guztioi zuzenduak dira. Musika, kirola, gastronomia, ikusentzunezkoak, bertsolaritza, literatura etabar izaten dute ardatz eta aurten aurreratu duten moduan, Karmele Jaio idazlea eta Edorta Lamo sukaldaria izango dituzte, besteak beste.
Kontzertuak, diaporamak eta zineforumak ere antolatuko dira ekainera arte iraungo duen egitarau oparo honetan.
Zadorra AEK euskaltegiaren 5.urteurren jaia
Azkenik, Zadorra AEK euskaltegiaren 5.urteurrena ospatuko du aurten euskaltegiak. Ospakizuna irailaren 14an izango da., 11:00etan euskaltegian. Ondoren Zumaia plazara mugituko da festa, Kidamen magiaz, dantza plazaz, gargantuaz... gozatzeko.