Proiektua bi zatitan banatzen da: sorkuntza eta produkzioa. Gaur hasi dira sorkuntza lanetan eta bi astetan zehar horma-irudi erraldoian zer margotuko den eztabaidatuko dute. Prozesu parte-hartzailea da eta margolari taldea 30 lagunek osatuko dute, tartean Javier Hernandez Landazabal artista gasteiztarra eta Veronica Werckmeister muralista.
Lehendabiziko fase honetan, gainera, gaira hurbiltzeko jardunaldi irekiak antolatu dira. Bihar bertan, irailaren 3an, Tour Memoria egingo da auzoan zehar, Martxoak 3 elkartearen gidaritzapean. Asteazkenean, aldiz, eztabaida irekia izango da Amparo Lasheras, Juantxo Estebarantz eta Zigor Olabarriarekin. Aste honetan ere, zehazki ostegunean, Belfasteko Unibertsitateko Justizia Trantsizionalaren Institutan irakaslea den Bill Rolstonek Ipar Irlandako muralen inguruko hitzaldia eskainiko du. Eta azkenik, irailaren 10ean, Bakeola elkarteak giza eskubideen inguruko jardunaldia antolatu du. Datozen egunotan izango diren ekintza hauetariko batzuetan parte hartzaile kopurua mugatua izango da, beraz, beharrezkoa da aurretik izena ematea info@muralismopublico.com helbidean.
Segidan, mural erraldoiaren proiektuaren produkzio faseari ekingo diote. Aurreikusitakoaren arabera, margolariak irailaren 16tik urriaren 11ra igoko dira bederatzi pisuko aldamioetara memoria kolektiboaren horma-irudia erraldoia guztiz gorpuzteko.